வியாழன், ஏப்ரல் 26, 2018

பாலியல் கொடுமைகளிலிருந்து சிறுமிகளை காக்கும் போஸ்கோ சட்டம்


சமீப காலங்களில் சிறுமிகளின் மீதான பாலியல் வன்கொடுமைகள்  அதிகம் நடக்குது. சிறுமிகளுக்கு சமமா சிறுவர்கள்மீதும் இந்தமாதிரியான பாலியல் அத்துமீறல்கள் நடந்துக்கிட்டுதான் இருக்கு. ஆனா, அதுலாம் வெளிச்சத்துக்கு அதிகம் வருவதில்லை. உயிர்சேதம் நிகழும்போது மட்டுமே செய்திகளில் அடிபடும். பாலியல் வன்முறைக்கு ஆளாகும் பெண்கள் எதிர்கால நலன் கருதி பெரும்பாலும் மறைச்சுடுவாங்க. இல்லன்னா கட்டப்பஞ்சாயத்து மூலம் இந்த விசயம் வெளில வராம பார்த்துப்பாங்க. பாலியல் வன்கொடுமையோடு, சித்திரவதைகள், உயிரிழப்புன்னு  குற்றத்தின் அடர்த்திக்கேற்ப அந்தக்கொடுமை, அப்போதைக்கு விவாத பொருளாக்கி, சிலநாளில் அங்கிருந்து நகர்ந்துடுவோம். மீண்டும் அடுத்த குற்றம் நிகழ்ந்தால், கடுமையான தண்டனை இருந்தால் இம்மாதிரியான குற்றம், நடக்காது, பெண்ணை இப்படி வளர்க்கனும், ஆணுக்கு இப்படி புத்தி சொல்லனும்ன்னு மீண்டும் விவாதிப்போம். சமூகவலைத்தளங்களில் ஆசிஃபாக்கு நடந்த கொடுமைக்கு எதிரா வைத்த பல்வேறு கருத்துகளுக்கு பதில் சொல்லும் விதமாகவும், சமீபத்துல அதிகரித்து வரும் சிறார் பாலியல் கொடுமைகளுக்கு தீர்வு காணவும் மத்திய அரசு புதுசா ஒரு சட்டம் கொண்டு வந்திருக்கு. அதுக்கு பேரு போஸ்கோ.

 மாநிலங்களவையில் 2012ம் ஆண்டு மே மாதம் 10ம்தேதியும், மக்களவையில் மே மாதம் 22ம் தேதியும் இந்த சட்டம் நிறைவேற்றப்பட்டது. இதற்கான விதிமுறைகளும் உருவாக்கப்பட்டு, நவம்பர் 14ம் தேதி அரசிதழில் அறிவிக்கை வெளியிடப்பட்டது. இச்சட்டம் வரும்முன் , குழந்தைகள் மீதான பாலியல் வன்முறை, இந்திய தண்டனை சட்டப்பிரிவுகளின்கீழ் வழக்குப்பதிவு செய்யப்பட்டது. இப்பிரிவுகள், குழந்தைகள், வயது வந்தவர்கள் என்ற வித்தியாசமின்றி வழக்குகளைக் கையாண்டன.


பொதுவான அம்சம்
18 வயதுக்குக் குறைவான அனைத்துக் குழந்தைகளும் பாலின வித்தியாசமின்றி, இச்சட்டத்தின் வரையறைக்குள் வருவர். அதாவது ஆண் குழந்தைகள் பாதிக்கப்பட்டாலும், இச்சட்டம் தலையிடும். பாலியல் தாக்குதல்/வன்முறை, பாலியல் துன்புறுத்தல்/சீண்டல், ஆபாசப் படமெடுக்கக் குழந்தைகளைப் பயன்படுத்துதல் போன்றவற்றைக் குற்றங்களாக இச்சட்டம் சொல்லுது. 30 நாட்களுக்குள் குழந்தையின் சாட்சியம் பதிவு செய்யப்பட வேண்டும். ஒரு வருடத்துக்குள் வழக்கு முடிய வேண்டுமென்பது மிக முக்கியம். சாதாரண சிறை தண்டனையிலிருந்து, கடுங்காவல், ஆயுள் தண்டனை வரை கொடுக்கலாம் என சட்டத்தில் சொல்லப்பட்டிருக்கு.
சிலவகை பாலியல் வன்முறைக்குக் கூடுதல் தண்டனை உண்டு. உதாரணத்துக்கு, காவல் துறையினர், பாதுகாப்புப் படையினர், ராணுவம், அரசு அதிகாரிகள் போன்றவர்கள் பாதுகாவலர்கள் அல்லது நம்பிக்கைக்குரியவர்கள்ன்னு அவர்களே இந்தமாதிரி குற்றத்தில் ஈடுபடும்போது, அதிக தண்டனை உண்டு என இச்சட்டம் சொல்லுது. பாதிக்கப்பட்ட குழந்தைக்கு மாவட்ட அளவில் குழந்தை பாதுகாப்புப் பிரிவு அமைக்கப்படனும். தனிக்காவல் துறை பிரிவும் ஏற்படுத்தப்படனும். பாதிக்கப்பட்ட குழந்தை எங்கு இருந்தால், அக்குழந்தையின் நலனுக்கு உகந்ததுன்னு பார்க்கனும். சிலசமயம், குடும்ப உறுப்பினர்களே குற்றம் செய்பவராக இருந்தால், அங்கிருந்து குழந்தையை வேறு இடத்துக்கு மாத்தனும்.

குழந்தை நலன்
இக்குற்றத்திற்கென சிறப்பு நீதிமன்றங்கள்  நிறுவப்படனும். வழக்கின் துவக்கத்திலிருந்து இறுதி வரை புகார் கொடுப்பது,  முதல் தகவல் அறிக்கை பதிவு, விசாரணை, வாக்குமூலப் பதிவு, வழக்கு நடப்பது.. என அனைத்திலும் பாதிக்கப்பட்ட குழந்தயின் நலனை கருத்தில் கொள்ள வேண்டியதுதான் மிக முக்கியத்துவம் அளிக்கப்பட வேண்டிய அம்சம் என்று சட்டம் கூறுகிறது. உதாரணமாக, “பாதிக்கப்பட்ட சிறுமி/சிறுவரின் சாட்சியம் அவர்களின் வீட்டிலோ அல்லது அவர்கள் விரும்புகிற இடத்திலோதான் பதிவு செய்யப்படனும். துணை ஆய்வாளர் அல்லது அதற்கு மேற்பட்ட பொறுப்பில் உள்ள பெண் காவல் அதிகாரிதான்  சாட்சியத்தை பதிவு செய்யனும். அப்படி விசாரிக்கையில் போலீஸ் அதிகாரி யூனிஃபார்ம்ல இருக்கக்கூடாது.”இரவு நேரத்தில், அவர்களைக் காவல் நிலையத்தில் வைத்துக் கொள்ளக்கூடாது. குழந்தை எதை எப்படி சொல்லுகிறதோ, அதை அப்படியே அந்த வார்த்தைகளில் பதிவு செய்ய வேண்டும். மாற்றுத்திறனாளி என்றால், குழந்தை பேசுவதைப் புரிந்து கொண்டு எடுத்துச் சொல்ல சைகை மொழி பேசுபவர் அல்லது குழந்தையின் பெற்றோர், உறவினரின் உதவியுடன் செய்யனும். மருத்துவப் பரிசோதனை, பெற்றோர், உற்றோரின் முன்னிலையில் செய்யனும். அவசர மருத்துவ சிகிச்சை அளிக்க நேரும்போது, மருத்துவர்கள் காவல்துறை அல்லது நீதித்துறையின் உத்தரவைக் கேட்கக்கூடாது. வழக்கு நடக்கும்போது, அடிக்கடி குழந்தை ஆசுவாசப்படுத்திக்கொள்ள நேரம் ஒதுக்கனும். விசாரணையோ, வழக்கோ, வாக்குமூலமோ பாதிக்கப்பட்ட சிறுமி/சிறுவரைத் திரும்ப திரும்ப நடந்ததைச் சொல்ல வற்புறுத்தக்கூடாது. குறுக்கு விசாரணைன்ற பேரில் குழந்தையை சங்கடப்படுத்தும் கேள்விகள் அல்லது நடத்தையை சந்தேகிக்கும் கேள்விகளைக் கேட்கக்கூடாது.


சிறுவர்கள் பாதுகாப்பு தொடர்பான பிரிவுகள்
குற்றம் இழைத்தவர்கள் மட்டுமல்ல, குற்றத்தை செய்யும் நோக்கத்துடன் அதற்காக முயற்சித்தவர்களும் குற்றவாளிகள்தான். பாலியல் வன்முறை செய்ய, ஒரு சிறுமியை இழுத்துச் சென்றிருக்கலாம். யாரோ வருகிறார்கள் என்பதற்காக விட்டுவிட்டு ஓடியிருக்கலாம். பணம் திருடினாளா என்று பரிசோதிக்கவே தனியாக அழைத்து வந்தேன் என்று ஆசிரியர் கூறி தப்பிக்க்க பார்க்கலாம். வழக்கு வந்தால், குற்றம் நடக்கவில்லையே என்று தப்பித்துக் கொள்ள வாய்ப்பிருக்கிறது. ஆனால் இச்சட்டம், தப்பிக்கும் வழியை மிகச் சரியாக அடைக்கிறது. குற்றத்துக்கு என்ன தண்டனையோ, அதில் பாதியை குற்றம் செய்யும் நோக்கத்துடன் முயற்சிப்பவர்களுக்கு வழங்கவேண்டும் என்று கூறுகிறது.

மற்றொரு முக்கிய பிரிவு, பாலியல் வன்கொடுமை குற்றத்தைப் பொறுத்தமட்டில், குற்றம் நடந்தது என்று மனுதாரர் ப்ராசிகியூஷன் தரப்பு நிரூபிக்க வேண்டியதில்லை. குற்றவாளிதான், தான் குற்றம் செய்யவில்லைன்னு நிரூபிக்கனும் என இச்சட்டம் வலியுறுத்துகிறது. பாலியல் வன்முறைக்கு உள்ளாக்கப்பட்ட சிறுவர், சிறுமியர் பெயரையும், அடையாளத்தையும், சிறப்பு நீதிமன்றத்தின் அனுமதியில்லாமல் ஊடகங்கள் வெளியிடக்கூடாது என்பது அழுத்தமாக சொல்லப்பட்டிருக்கிறது. காவல் துறையும் வெளியிடக்கூடாது என்பதும்  இதன் முக்கிய நோக்கம்.

இழப்பீடு அல்லது நிவாரணம்
சிறப்பு நீதிமன்றம் தாமாகவோ, அல்லது பாதிக்கப்பட்டோரின் மனுவின் அடிப்படையிலோ தேவையைப் பொறுத்து இடைக்கால நிவாரணம் வழங்கலாம். இறுதியில், குற்றவாளி தண்டனை பெற்றாலும், விடுவிக்கப்பட்டாலும் நிவாரணம் வழங்கலாம். குற்றவாளியை அடையாளம் காண முடியாவிட்டாலும், தலைமறைவாகப் போய்விட்டாலும்கூட, இழப்பீடு வழங்கலாம். உடல் காயம், மன உளைச்சல், மருத்துவச் செலவு, குடும்பத்தின் பொருளாதார நிலை ஆகியவற்றைக் கணக்கில் எடுக்க வேண்டும். மன/உடல் நிலை சரியில்லாமல் அல்லது விசாரணை, வழக்குக்குச் செல்வதற்காகப் பள்ளி செல்ல முடியாத நிலை ஏற்பட்டால் அதையும் கணக்கில் எடுத்துக்கனும்.

பாதிக்கப்பட்ட குழந்தைக்கு எச்.ஐ.வி. நோய்க்கிருமி தாக்கியிருந்தாலோ, கர்ப்பமாகிவிட்டாலோ அல்லது  ஊனமடைந்துவிட்டாலோ  அவையும் எடுத்துக் கொள்ளப்பட்டு, இழப்பீடு வழங்கப்படனும். மாநில அரசே நிவாரணத் தொகையை வழங்கனும். நீதிமன்ற உத்தரவு பெற்று 30 நாட்களுக்குள் இது அளிக்கப்படவேண்டும்.இவ்வளவு வாய்ப்புகள் இருக்கிறது என்று தெரிந்தால்தானே, பாதிக்கப்பட்ட குழந்தையும், பெற்றோரும் அவற்றைப் பயன்படுத்திக் கொள்ளமுடியும்?!  அதனால், இவைக் குறித்து, வழக்கின் ஆரம்பத்திலேயே  அவர்களுக்கு  கூறப்பட வேண்டும் என்பது இச்சட்டத்தின்கீழ் கட்டாயமாக்கப்பட்டிருக்கிறது. அதேப்போல் வழக்கின் விவரம் அவ்வப்போது அவர்களுக்குத் தெரிவிக்கப்படனும்.தேசிய/மாநில குழந்தைகள் உரிமை பாதுகாப்பு ஆணையம்தான் இச்சட்டத்தின் அமலாக்கத்தைக் கண்காணிக்க வேண்டும்.

கர்நாடக அரசின் புதிய சட்ட விதி
பள்ளிக் கல்லூரிகளில் மாணவ, மாணவியரின் பாதுகாப்பை கருத்தில் கொண்டு, 113 அம்சங்கள் அடங்கிய விதிமுறைகளை அமல்படுத்த, கர்நாடக மாநில அரசு தீர்மானித்தது. இதற்கான சட்ட வரைவு தயாரித்து வெளியிடப்பட்டுள்ளது. அதில் பள்ளி, கல்லூரிகளில், மாணவ, மாணவியரின் சுகாதாரம், அடிப்படை வசதிகள், தனிப்பாதுகாப்பு, போக்குவரத்து வசதி உள்ளிட்ட அனைத்து அம்சங்கள் தொடர்பாக, 113 விதிமுறைகளை வகுத்து வெளியிட்டுள்ளது. சமீபத்தில், பள்ளி, கல்லூரி மாணவியர் மீதான பாலியல் வன்முறை சம்பவங்களுக்குப் பின், மாணவ, மாணவியரின் பாதுகாப்புக்காக, கர்நாடக அரசு வழிக்காட்டு நெறிமுறைகளை வெளியிட்டது. இதைத்தொடர்ந்து, கர்நாடக உயர் நீதிமன்ற உத்தரவின்படி, பெங்களூரு நகர போலீஸ் கமிஷனர் அலுவலகமும் விதிமுறைகளை வெளியிட்டது. இருப்பினும் பெங்களூருவில், சிறுமியர் மீதான பாலியல் வன்முறை குற்றங்கள் குறையவில்லை. 
இதைத் தீவிரமாக எடுத்துக்கொண்ட அரசு, முதன்முறையாக பள்ளிக் கல்லூரி மாணவ, மாணவியரின் பாதுகாப்புக்காக சட்ட விதிமுறைகளை அமல்படுத்த முன்வந்துள்ளது. இதன்மூலம், கல்வி நிறுவனங்களுக்கும் சட்டத்தின்மூலம் கடிவாளம் போட அரசு முடிவு செய்தது. அதற்காக புதிய சட்ட விதிமுறைகளை கைத்தேர்ந்த சட்ட நிபுணர்கள் மூலம் தயாரித்து அதை மூன்று தொகுப்புகளாக பிரித்துள்ளது. முதல் தொகுப்பில் பள்ளி, ஆசிரியர்கள், கல்வி நிறுவனங்கள், பெற்றோர், மாணவர்களின் பொறுப்பு குறித்த தகவல்கள் இடம் பெற்றுள்ளது. இரண்டாவது தொகுப்பில் பாதுகாப்பு நடவடிக்கைகள், அதை செயல்படுத்துவது தொடர்பாக விவரிக்கப்பட்டுள்ளது. மூன்றாவது தொகுப்பில் பள்ளிகளில் கட்டாயம் இருக்கவேண்டிய அடிப்படை வசதிகள் உள்பட பிற அம்சங்கள் கொடுக்கப்பட்டுள்ளது. அரசு வெளியிட்டுள்ள 113 அம்சங்களில், 94 அம்சங்களை கட்டாயமாகப் பின்பற்ற வேண்டுமென்று உத்தரவிடப்பட்டுள்ளது. குழந்தை தொழிலாளர்கள் தடை சட்டம், குழந்தைகள் நீதி சட்டம், குழந்தைகள் உரிமைகள் பாதுகாப்பு சட்டம், குழந்தை திருமண தடைச் சட்டம், கல்வி உரிமை சட்டம், போஸ்கோ சட்டம், ஐ.நா., சபையின் வழிகாட்டுதல் உள்பட பல அம்சங்கம் இதில் இடம் பெற்றுள்ளது.  
பனிரெண்டு வயதுக்கு கீழான சிறுமிகள்மீதான பாலியல் குற்றங்கள் நிரூபிக்கப்பட்டால் மரணதண்டனைன்னு நாடாளுமன்றத்தில் புதுச்சட்டம் இயற்றப்பட்டுள்ளதாக தகவல்கள் வெளியாகும் அதேநேரத்தில் வரப்போகும் புதுச்சட்டம் பெண்பிள்ளைகளுக்கு மட்டும்தானா?! இல்ல ஆண்பிள்ளைகளுக்குமானதா?!  பாலியல் சீண்டலை வெளியில் சொல்லக்கூடாதுன்னு  கொலைக்குற்றம் அதிகரிக்கும்.. அதென்ன 12 வயதுக்குட்பட்ட குழந்தைகள்ன்னு.. மொத்தமா பாலியல் வன்கொடுமைகளுக்கு மரண தண்டனை.. அதும் பொதுவெளியில் நிறைவேற்றப்படும்ன்னு தீர்ப்பை மாத்துங்க நாட்டாமைன்னு சமூகவலைத்தளங்களில் கருத்துகள் உலா வருது.  

எது எப்படியோ பொக்கிஷமா குழந்தைகளை நினைக்கலைன்னாலும் பரவாயில்ல போகப்பொருளாய் நினைக்கும் அவலம் இனி நேரமா இருந்தால் சரி.

நன்றியுடன்,
ராஜி



புதன், ஏப்ரல் 25, 2018

வீரம் விளைஞ்ச மண்ணு.. எங்க வேலூர் மண்ணு - மௌனச்சாட்சிகள்

வீட்டில் ஒரு பூ பூப்பதை, பிறந்த நாளை, பிக்னிக் போனதைன்னு எல்லாத்தையும் படமெடுத்து, ஃபேஸ்புக், ட்விட்டர், இன்ஸ்ட்ராகிராம்ன்னு பகிர்ந்துக்கிறோம். கொஞ்ச காலத்துக்கு முன்னலாம் படமெடுத்து போட்டோக்களாக்கி ஃப்ரேம் பண்ணி வீட்டில் மாட்டி அழகு பார்ப்போம்.  இதுவே, 300, 400 ஆண்டுகளுக்கு முந்திலாம் எந்தவொரு நிகழ்ச்சிக்கும் கோவில் கட்டுறது, கோட்டை கட்டுறது, சிற்பம் வடிக்குறது, நடுகல் நடுறதுனு தங்கள் மகிழ்ச்சியை, வீரத்தை, சோகத்தைலாம்  நினைவுச் சின்னங்களாக்கினாங்க. இந்த நினைவுச்சின்னங்கள்தான் இன்னிக்கு பண்டைய காலத்தின் வாழ்வியல், பண்பாடு, கலாச்சாரத்தினை நமக்கு எடுத்து சொல்லுது.  சரியான விழிப்புணர்வு இல்லாததால் பாதிக்கு மேலான நினைவுச்சின்னங்களை அழிய விட்டுட்டோம். இனி இருக்கும் மிச்ச சொச்சத்தையாவது எதிர்கால சந்ததிகளுக்கு காப்பாத்தி வைப்போம்.

வேலூர் மாநகரின் மையத்தில் 133 ஏக்கர் பரப்பளவில் பரந்தது வேலூர் கோட்டை. கி.பி 16 ஆம் நூற்றாண்டில் விஜயநகர பேரரசு தமிழகத்தின் ஒரு பகுதியை ஆண்டுக்கொண்டுயிருந்தபோது வேலூர், திருப்பதி, சென்னைலாம் விஜயநகர பேரரசுவின் கட்டுப்பாட்டில் இருந்தது. விஜயநகர பேரரசுவின் பிரதிநிதியாக 1566ல் இருந்த பொம்முநாயக்கர்ன்ற குறுநில மன்னரால் வேலூர் கோட்டை கட்டப்பட்டது. கருங்கல்லால் கட்டப்பட்ட இந்த கோட்டை வலிமையானது. கோட்டையை சுற்றி அகழியும் வெட்டப்பட்டு எதிரிகளிடம் இருந்து பாதுகாக்கப்பட்டது.

நாயக்கர்களிடமிருந்து 1650ல் பிஜப்பூர் சுல்தானால் இக்கோட்டை கைப்பற்றப்பட்டது. 25 ஆண்டுகால ஆட்சிக்குப்பின் 1676ல் மராட்டியர்கள் கைப்பற்றினர். 30 ஆண்டு ஆட்சிக்கு பின் 1708ல் டெல்லியை ஆண்ட தௌலத்கான் கைப்பற்றினார். அப்போது நவாப்களின் கட்டுப்பாட்டில் வேலூர் கோட்டையிருந்தது.
கர்நாடகா நவாப்கள் என அழைக்கப்பட்டவர்கள் வேலூரில் இருந்து 25 கி.மீ தொலைவில் உள்ள ஆற்காட்டை தலைநகராகக் கொண்டு ஆட்சி செய்து வந்தனர். அவர்கள் டெல்லி தௌலத்கான் கட்டுப்பாட்டில் இருந்து சுதந்திரமாக வெளியேறியபோது நவாப்கள் கட்டுப்பாட்டில் இருந்த பகுதிகள் சுதந்திர பகுதியாக மாறின. நவாப்கள் ஆங்கிலேயரின் நண்பர்களாக இருந்தனர். அதன்மூலம்  நவாப் வசமிருந்த வேலூர் கோட்டை ஆங்கிலேயர் வசமானது. 1760ல் முதல் ஆங்கிலேயர் வேலூரின் ஆட்சியாளர்கள் ஆனார்கள். இந்தியாவில் ஆங்கிலேயர்கள் முதலில் வென்ற இடம் ஆற்காடு. அவர்கள் அங்கிருந்து ஆளும்போது அருகில் இருந்த வேலூர் கோட்டையை வெடிமருந்துகள் சேமிக்குமிடமாகவும்,  இராணுவ வீரர்கள் தங்கும் இடமாகவும் வைத்திருந்தனர்.
மைசூர் புலி திப்புசுல்தான் இறந்தபின்னர் அவரது குடும்பத்தை இங்குதான் முதலில் சிறை வைத்தனர் ஆங்கிலேயர்கள். அதேப்போல் இலங்கை கண்டி மாகாணத்தின் கடைசி அரசர் விக்கிரமராஜசிங்கன் மற்றும் அவரது மனைவி, மக்களையும் இந்த கோட்டையில்தான் இறக்கும் வரை சிறை வைக்கப்பட்டனர். அதேபோல் விஜயநகர பேரரசின் அரசராக இருந்த ரங்கராயன் இந்த கோட்டையில் வைத்துதான் கொல்லப்பட்டார். 
1805ம் வருடம் பிரிட்டிஷ் ராணுவ அதிகாரி, இந்திய சிப்பாய்கள் விபூதி,குங்குமம், நாமம் மாதிரியான சமயக் குறியீடுகள் இடுவதும், காதுகளில் தோடு, கடுக்கன் அணிவதும், கிருதா வைக்கக்கூடாது. ஐரோப்பிய பாணியில் நீண்ட குழாய் மாதிரியான தொப்பியையும், தோலிலான பெல்ட்டும் அணிய வேண்டுமென கட்டளை பிறப்பிக்கப்பட்டது. இதுக்கு எதிராக மெட்ராஸ் ரெஜிமெண்டை சேர்ந்த தென்னிந்திய இந்து, முஸ்லீம்   சிப்பாய்கள் ஆங்கிலேயருக்கு எதிராக ஒன்று திரண்டனர். கலகக்காரர்களின் தலைவர்களுக்கு 600 கசையடி கொடுக்கப்பட்டது. இச்செயல் கலகக்காரர்களை இன்னும் கோவப்படுத்தி வெகுண்டெழ வைத்தது.
சிப்பாய்களுக்கு ஆதரவாக திப்பு சுல்தானின் மகன்கள் ஆதரவு தெரிவித்தனர்.  திப்பு சுல்தானின் மகன் திருமணத்தை காரணம் காட்டி ஆங்கிலேய அதிகாரிகள் கோட்டைக்கு வரவழைக்கப்பட்டனர். 10/7/1806ம்தேதி, அதிகாலையில் ஆங்கிலேயர்கள் தங்கள் படுக்கை அறையிலேயே வைத்து  கொல்லப்பட்டனர். அங்கிருந்த 350 ஆங்கிலேயர்களில் 100பேர் கொல்லப்பட்டனர். இந்த கலகம், ராணுவ ஒழுங்கில், திட்டமிடலின்றி, எதிர்படும் ஆங்கிலேயர்களையெல்லாம் கொன்று குவித்தனர். வெற்றி களிப்பில் கோட்டை வாயிலைக்கூட அடைக்கவில்லை. அதனால், ஆற்காட்டிலிருந்து பறந்து வந்த சிறிய பிரிட்டீஷ் குதிரைப்படை சிப்பாய் கலகத்தை சில மணிநேரங்களிலேயே அடக்கி வேலூர் கோட்டையை தன்வசப்படுத்திக்கொண்டது. 
இந்திய சிப்பாய்களில் 350பேருக்கு மேல் இப்போரில் கொல்லப்பட்டனர். பீரங்கியின் வாயில், கலகக்காரர்களை கட்டி வைத்து சுட்டு கொல்லப்பட்டனர்.   சிப்பாய் கலகம் தோல்வியை சந்தித்தாலும் இந்திய விடுதலைப்போர் வரலாற்றில் முக்கிய பங்காற்றியது.  இதன் நினைவாக கோட்டைக்கு எதிரில் நினைவுத்தூண் எழுப்பப்பட்டுள்ளது. ஜூலை 10ந்தேதி இந்திய ராணுவத்தினரால் இங்கு உயிரிழந்த சிப்பாய்களுக்காக வீரவணக்கம் செலுத்தப்படுது. 
சிப்பாய் கலகத்தின் நினைவாக இந்திய அரசாங்கம் 2006, ஜூலையில் தபால் தலை ஒன்றை வெளியிட்டு வேலூர் மண்ணின் வீரத்தை கௌரவப்படுத்தியுள்ளது. 

வேலூர் கோட்டையின் சுருக்கமான வரலாறு..

1506 - சின்ன பொம்ம நாயக்கரால்  கட்டப்பட்டது (விஜயநகர பேரரசு)
1650 - பிஜப்பூர் சுல்தான் கைப்பற்றினார்..
1676 -மராட்டியர்கள் கைப்பெற்றினார்கள்
1708 - தௌலத்கான் (டெல்லி) கைப்பற்றினார்
1760 -பிரிட்டிஷ்காரர்களால் கைப்பற்றப்பட்டது
1806 -முதல் சிப்பாய் கலகம் நடைப்பெற்றது.
இந்திய தொல்பொருள் கழகத்தால் வேலூர் கோட்டைக்குள் அருங்காட்சியகம் வைக்கப்பட்டுள்ளது.  வேலூர், ஆற்காடு, வாணியம்பாடி, ஆரணி, திருவண்ணாமலை பகுதிகளில் கிடைக்கும் பழங்கால சிற்பங்கள், பொருட்கள்லாம் இங்கு காட்சிப்படுத்தப்பட்டுள்ளது. 

ஒவ்வொரு சிற்பத்துக்கும் கீழே, அது எந்த இடத்தில், எந்த வருடத்தில், என்ன சிற்பம்ன்னு பொறிக்கப்பட்டுள்ளது. 
வேற்று மதத்தினரால் பலமுறை கைப்பற்றப்பட்ட இக்கோட்டை சேதத்துக்குள்ளாக்கப்பட்டாலும், இன்னமும் தன்னகத்தே பலவித கலைப்பொக்கிஷங்களை உள்ளடக்கி வைத்திருப்பது ஆச்சர்யம்தான். 

லட்சுமி நரசிம்மர்...

வினாயகர்....
அக்னிதேவன், தன் மனைவியுடன்...


பிரம்மா...

சிவன், நந்தியுடன்...

மதுரை நாயக்கர் மகால் தூண் அளவுக்கு இல்லன்னாலும் பெரிய தூண்... என்னா வழுவழுப்புடா சாமி!!
கல்லால் ஆன நீர் சேகரிக்கும் தொட்டி.. இதுமாதிரி நிறைய தொட்டிங்க இந்த இருக்கு...

பூதகணங்கள்.....
வேலூர் பகுதியில் கண்டெடுக்கப்பட்ட கோவிலின் ஒரு பகுதி.....

பாதுஷா மகால், ஹைதர் மகால், பேகம் மகால், கண்டி மகால்ன்னு நிறைய பகுதிகள் இருக்கு. திப்பு சுல்தான் வாரிசுகளின் படங்கள், போர்க்கருவிகளின் படங்கள், பல்வேறு மன்னர் குடும்பத்தின் படங்கள், ஆங்கிலேய அதிகாரிகளின் படங்கள் இருக்கு. இன்னும் அரிய வகை படங்களும், பல்வேறு சித்திரம், சிற்பங்களும் பார்வைக்கு இருக்கு. நுழைவுக்கட்டணம் ஏதுமில்லை. 
பொம்மிரெட்டி, நாகிரெட்டிக்கு நாகர் வழிபாட்டில் அலாதி பிரியமாம்... அதனால, கோட்டையில் ஜலகண்டேஸ்வரர் கோவிலுக்கு வெளிப்புறத்தில் நாகராஜன் சன்னிதி.. 
எந்த விசயமா இருந்தாலும் இந்த கோவிலில் உக்காந்துதான் முடிவெடுப்பாங்களாம். இந்த நாகராஜன்தான் , அத்ரி முனிவர் வழிப்பட்டு புதர் மண்டிப்போன ஜலகண்டேஸ்வர லிங்கத்தை அடையாளம் காட்டியதுன்னு நம்பினாங்களாம். 
நாகராஜா சன்னிதியில் நூற்றாண்டுகளை கடந்த ஆலமரம்...

அந்த காலத்து காவல்தெய்வத்துடன்  இந்த காலத்து காவலர்...

யானையும், குதிரையும், சேணையும் கட்டி வச்ச இடத்தில் இன்று மாடுகள்.....

எந்த பொருளுமே நம்மோடு இருக்கையில் அதன் அருமை தெரியாது. அதை இழந்துட்ட பின்னாடிதான் புலம்புவோம். அந்த வரிசையில் பழந்தமிழர்களின் கலை, கலாச்சாரம், பண்பாடு, வீரம்ன்னு எல்லாத்தையும் நினைவுறுத்தும் இடங்களை கொஞ்சம் கொஞ்சமா இழந்துட்டு வர்றோம். பிற்காலத்தில் வருந்தி தேடினா கிடைக்காது.. அதனால், இருக்குற மிச்ச சொச்சத்தையாவது காப்பாத்திப்போம்..  இத்தோடு வேலூர் பதிவு முடிவடைஞ்சது.... பல பதிவுகளாய் வேலூரை பத்தி படிச்சதுக்கு ரொம்பவே தேங்க்ஸ்..

அடுத்த வாரம், சுவாமி விவேகானந்தர் ஜீவ சமாதி பத்தி பார்ப்போம்...

நன்றியுடன்,
ராஜி.

செவ்வாய், ஏப்ரல் 24, 2018

வெஜ் ஃப்ரை ரைஸ் - கிச்சன் கார்னர்

ஹோட்டல்ல விதம் விதமா சாப்பாட்டு ஐட்டம் இருந்தாலும், பசங்களை ஈர்ப்பதுலாம் பரோட்டா, நூடுல்ஸ், ஃப்ரை ரைஸ்தான். ஆனா, ஃப்ரை ரைஸ் கடையில் வாங்கினால் காரம் அதிகமா கொட்டி கொடுத்துடுறாங்க. இல்லன்னா, பச்சகுழந்தை வாயில் முத்தம் கொடுத்தமாதிரி சப்ப்புன்னு இருக்கும்.  அதனால, இப்பலாம் நானே வீட்டுலயே ஃப்ரை ரைஸ் செஞ்சுடுறது. ஹோட்டல்ல, அஜினோமோட்டோலாம் சேர்க்குறாங்கன்னு வேற டிவி நியூஸ்ல பயமுறுத்துறாய்ங்க. வீட்டில் செஞ்சா இந்த பயம்லாம் இல்ல பாருங்க...

தேவையான பொருட்கள்...
உதிர் உதிரா வடிச்ச சாதம்..
கேரட், பீன்ஸ், கோஸ், குடை மிளகாய், வேகவச்ச பட்டாணி, வெங்காய தாள்ன்னு கைக்கு கிடைக்கும் காய்கறிகள்,
உப்பு,
சோயா சாஸ்,
கொத்தமல்லி
எண்ணெய்

அரிசியை ஊற வெச்சு, சாதமா வேகவைக்கும்போது கீறின ப.மிளகாய், பட்டை, லவங்கம், உப்பு போட்டு வடிச்சுக்கனும். ஊற வெச்ச பட்டாணி/ சென்னாவை வேக வச்சுக்கனும்.  கேரட், பீன்சை பொடுசா நறுக்கி உப்பு போட்டு லேசா வேகவச்சு வடிச்சுக்கனும். குடைமிளகாய், முட்டைக்கோஸ், வெங்காய தாள்லாம் பொடுசா வெட்டிக்கனும்.

வாணலியில் எண்ணெய் ஊத்தி காய்ந்ததும் குடைமிளகாய் போட்டு வதக்கிக்கனும்....., 

அடுத்து முட்டைக்கோஸ், வெங்காயதாள்லாம் சேர்த்து வதக்கிக்கனும்...

வேகவச்சு வடிச்சிருக்கும் பட்டாணி/சென்னா, பீன்ஸ், கேரட்டை சேர்த்துக்கனும்.
தேவையான அளவு உப்பு சேர்த்து ஈரமில்லாத அளவுக்கு வதக்கிக்கனும்...
வடிச்சு வச்சிருக்கும் சாதத்தை கொட்டி நல்லா கிளறிக்கனும். சோயா சாஸ் சேர்த்து நல்லா கிளறி கொ.மல்லி இழை பொடுசா நறுக்கி போட்டு பரிமாறிக்கலாம்.
ஃப்ரை ரைசின் சுவையை கூட்ட உருளையை சின்ன சின்ன சதுரமா வெட்டி எண்ணெயில் பொறிச்செடுத்து  இதில் சேர்க்கலாம். சாப்பிடும்போது அது தனி ருசியை கொடுக்கும். காளிஃப்ளவரை அப்படியே சேர்க்காம, காளிஃப்ளவரை சுத்தம் செஞ்சு தயிர், மிளகாய்தூள், உப்பு, கார்ன்ஃப்ளவர் மாவு, இஞ்சிபூண்டு பேஸ்ட் சேர்த்து ஊற வச்சு எண்ணெயில் பொறிச்சு காளிஃப்ளவர் பக்கோடாவை சேர்க்கலாம். இப்பலாம் கடையில் ஃப்ரை ரைஸ்க்குன்னு மசாலா பொடி விக்குது. அதை சேர்த்தாலும் ஹோட்டல் டேஸ்ட் வாசனை வந்திடும். பீன்ஸ் கேரட்டை ஹோட்டல்ல வேகவைக்க மாட்டாங்க. ஆனா வீட்டில் செய்யும்போது அப்படி வேகாது. அதனால அரைவேக்காட்டில் வேகவச்சு சேர்த்துக்கலா

அசைவ பிரியர்கள் முட்டையை வாணலியில் உடைச்சு ஊத்தி,   உப்பு, மஞ்சள் சேர்த்து  கிளறி சேர்க்கலாம். ஆனா, முட்டையை ரொம்ப பொடிசா கிளறிக்கக்கூடாது. காளிஃபிளவரை போலவே, சிக்கனுடன், கார்ன்ஃப்ளவர், தயிர், உப்பு, மிளகாய்தூள், இஞ்சிபூண்டு பேஸ்ட் சேர்த்து ஊற வச்சு எண்ணெயில் பொறிச்சு சேர்த்தால் ஹோட்டல் டேஸ்ட் வரும்...

கிச்சன் கார்னர் தொடரும்...
நன்றியுடன்,
ராஜி

திங்கள், ஏப்ரல் 23, 2018

RETIREDன்னா என்னன்னு தெரியுமா?! ஐஞ்சுவை அவியல்

என்ன புள்ள! கலர்கலரா கண்ணாடி வளையல் வாங்கி வச்சிருக்கே! எம்புட்டு செலவாச்சு?! என் பர்ஸ்சை காலி பண்ணியாச்சா?!

மொத்தமே 300ரூபாதான் ஆச்சு..

அடிப்பாவி பொய் சொல்லாத. கிட்டத்தட்ட 10டசன் வளையல் வாங்கி வச்சிக்கிட்டு 300ரூபான்னு சொல்றியா?! பொய் சொல்லும் வாய்க்கு போஜனம் கிடைக்காது பாரு.
போஜனம் கிடைக்கலைன்னா டிஃபன், ஜூஸ், கஞ்சின்னு சமாளிச்சுக்குறேன். உங்களுக்கு அந்த கஷ்டம் வேணாம். ஆனா, இந்த அத்தனை வளையல்களும் வெறும் 300ரூபாயில்தான் வாங்கினேன். ஏன்னா, நான் பேன்சி ஸ்டோர் வாங்கி வரல. தெருவில் வரும் வளையல்கார தாத்தாக்கிட்ட வாங்கினேன். அதான் விலை குறைச்சலா இருக்கு.

வளையல்கார தாத்தாவா?! யாருக்கு காது குத்த பார்க்குறே?! இப்பலாம் அப்படி ஒரு வியாபாரியே இல்லன்னு ஐ நோ. முன்னலாம் ஒரு தகர டப்பாவில் வளையல்களை அடுக்கிக்கிட்டு, ஒரு பந்து மாதிரி வளையல்களை கையில் பிடிச்சுக்கிட்டு வீதிவீதியா கண்ணாடி விக்க ஆட்கள் வருவாங்க. அந்த தகரடப்பாக்குள், கண்ணாடி வளையல், ரப்பர் வளையல்ன்னு இருக்கும். கண்ணாடி வளையல்ல கல்யாண வளையல், சீமந்த வளையல், நதியா வளையல், ப்ளெயின் வளையல்ன்னு விதம்விதமா இருக்கு. வளையல் விக்குறவங்களோட ஸ்பெஷாலிட்டி பாட்டு பாடுறது, அவங்க பாட்டு பாடிக்கிட்டே பொண்ணுங்க கைப்பிடிச்சு வளையல் போடும் அழகே அழகு. அதும், வளையல் ஒடைஞ்சு போய் இருக்கான்னு பார்க்கும் ஸ்டைல் இன்னும் என் கண்ணுக்குள்ளயே இருக்குடி. எதாவது பொண்ணு, பையனை கல்யாணத்துக்கு செலக்ட் பண்ணுறதுக்கு முன், பொண்ணை பத்தி வளையல் விக்குறவங்க, துணி வெளுக்குறவங்கக்கிட்டயும், மாப்ளைய பத்தி சவரம் பண்ணுறவங்கக்கிட்டதான் விசாரிப்பாங்க. கல்யாணம், காதுகுத்து, சீமந்தம், சடங்கு, தாலி அறுப்புன்னு எதா இருந்தாலும் முன்கூட்டியே இவங்கக்கிட்ட சொல்லிவச்சு வளையல் போட்டுப்பாங்க. வீட்டில் நடக்கும் சுபநிகழ்ச்சியில் இது ஒரு சடங்காவே இருக்கும். பசங்க காதல், புருசன் பொண்டாட்டி சண்டை, பாகப்பிரிவினைன்னு எல்லாத்துக்கும் இவங்களை பஞ்சாயத்துக்கு இழுப்பாங்க. சுருக்கமா சொல்லப்போனா, வளையல் விக்குற ஆட்களை முன்னலாம் சொந்தக்காரங்களா நினைச்சு அவங்களுக்கு மரியாதை கொடுத்தது அந்த காலம். இப்பலாம், கடைக்கு போய் வளையல் வாங்கிட்டு வர்றது. அதுமில்லன்னா ஆன்லைன்ல புக் பண்ணும் காலமாகிட்டுது என்னத்த சொல்ல?! சரி, இப்ப எதுக்கு 10 செட் வளையல் வாங்குனே?! வீட்டில் அடுக்கி வச்சிருக்கும் வளையல்லாம் போதாதுன்னா?!

ம்க்கும். கௌதமுக்கு மொட்டை அடிச்சு காது குத்து வச்சதுக்காக வாங்கினது..

காதுகுத்து அவனுக்கு. நீ ஏன் இத்தனை வளையல் வாங்கினே?! சரி , குழந்தைகளுக்கு பிறந்த கொஞ்சநாளிலேயே குலதெய்வத்துக்குன்னு சொல்லி மொட்டை அடிக்குறது ஏன்னு தெரியுமா?!

சாமிக்கிட்ட வேண்டிக்கிட்டதை நிறைவேத்தனும்ல!? அதுக்காகத்தான்..

உன்கிட்ட பிரதிபலன் வாங்கிதான் உனக்கு நல்லது செய்வேன்னு எந்த தெய்வம் சொல்லுச்சு?! நாமளா நம்ம திருப்திக்கு பொங்கல், பூஜை, அலகு குத்துறது, விரதம்ன்னு இருக்கோமே தவிர, சாமி கேக்குறதுலாம் உள்ளன்போடு ஒருமுக நினைச்சு வணங்குறதுதானே தவிர ரிவெஞ்ச்லாம் இல்ல, சரி டாபிக் மாறுது. குழந்தைகளுக்கு மொட்டை ஏன் போடுறோம்ன்னா,  ஒரு குழந்தை தன் தாயின் கருவறைக்குள் இருக்கும்போது குழந்தையை ஒரு விதமான திரவம் சூழ்ந்துக்கொண்டு இருக்கும். அதுதான் நாம் பனிக்குடம். ஒரு கருவானது சில மாதங்களில் நன்கு வளர்ச்சி பெற்று சிறுநீர் கழிக்க ஆரம்பிக்கும். அந்த சிறுநீரானது பனிக்குடத்தின் திரவத்தோடு கலந்துவிடும். இப்படிப்பட்ட திரவத்தில் ஒரு குழந்தை 10 மாதமாக ஊறி இருக்கும். அந்த குழந்தை இந்த பூமியில் பிறந்த உடன் அதன் உடலை நன்றாக துடைத்து சுத்தம் செய்து அந்த திரவத்தை நீக்கி விடுவோம். ஒருவேளை கருவறையில் இருக்கும்போதே குழந்தை அதை குடித்து இருந்தால் அதன் உடல் தானாகவே அந்த திரவத்தை வெளியேற்றி விடும். ஆனா, திரவத்தில் 10 மாதம் ஊறி இருக்கும். ஆகையால் அது அவ்வளவு எளிதில் வெளியில் வர வாய்ப்பு இல்லை. அந்த கழிவுகள் வெளியே வர ஒரே வழி மயிர்கால்கள் மட்டுமே.  முடிக்கால்களில் ஒட்டிக்கிட்டிருக்கும் கழிவுகளினால் நோய்த்தொற்று ஏற்படாமல் இருக்க, பிறந்த சிலமாதங்களில் குலதெய்வத்துக்கு ஒரு மொட்டையும், அப்படியும் ஒட்டிக்கிட்டிருக்கும் மிச்சம்மீதி கிருமிகளை அடியோடு அழிக்க மூன்றாவது இரண்டாவது மொட்டையும் கொடுக்கப்படுதுன்னு சொன்னாலும் உள்ளர்த்தம் வேற!
பிறப்பு, மறுபிறப்பில் இந்துக்களுக்கு நம்பிக்கை அதிகம். அதனால, தொட்டக்குறை, விட்டக்குறையால், முன்ஜென்ம தொடர்புகள் எதாவது இருந்தால், அதை துண்டிப்பதற்காகத்தான் முதல் மொட்டை அடிக்கப்படுது. இறப்புக்கு பின் நம் ஆன்மா அவ்வளவு எளிதாய் இந்த உடலை விட்டு போய்டாது. இந்த உடல் காத்தோடு காத்தாய் கரையும்வரை, இந்த உடம்பில் புகுந்துக்கொள்ள ஆன்மா அலைப்பாயும். தலைமுடியில் இருக்கும் செல்தான் கடைசியா அழியுது. அந்த கடைசி செல்வரை, உடல்மீதான ஆன்மாவின் ஆசை விடாது. அதனாலதான் தலைமுடிக்கும், நம் ஆன்மாக்கும், மறுபிறப்புக்கும் சம்பந்தம் உண்டு., இப்படி மொட்டை அடிக்கப்படுவதால், முன் ஜென்மத்தின் தொடர்புகளை அறுத்துக்கொண்டு இப்பிறப்புக்குண்டான வாழ்க்கையை வாழத்தொடங்குது அந்தக்குழந்தை. இதுதான் குழந்தைகளுக்கு மொட்டை அடிக்க காரணம்.

இதுவே பெரியவங்க நேர்த்திகடனா மொட்டை அடிக்க காரணம், தலைமுடிங்குறது ஒருத்தங்க அழகை கூட்டும். அழகு, ஆணவத்தையும், பெருமையும் தரும். இறைவனுக்கு நமது அகங்காரம், ஆணவம், பெருமைலாம் அர்ப்பணித்து, உன்னை சரணாகதி அடைகிறேன். என்னை காப்பாத்துன்னு சொல்லாம சொல்லுறதுதான் இறைவனை எண்ணி மொட்டை போட்டுக்குறது...

இப்ப புரியுதுங்க. ஏன் மொட்டை போடுறாங்க. அப்படியே, காதுகுத்துக்கு தண்ணி ஏன் அடிக்குறாங்கன்னு சொல்லிட்டா நல்லா இருக்கும். ஏன்னா, கௌதமுக்கு மொட்டை அடிக்க போகும்போது, அங்க குடிமகன்கள் தாங்கமுடில. இந்த டாஸ்மாக்கை ஒழிச்சா தேவல.
டாஸ்மாக்கைலாம் அம்புட்டு ஈசியா ஒழிச்சுடமுடியாது. எந்த காலத்திலயும் மது இருந்துக்கிட்டுதான் இருக்கும். இந்தியா சுதந்திரம் அடைஞ்சப்பின் முதல் சரக்கு கடைன்னு சொல்லி வாட்ஸ் அப்ல இந்த போட்டோ சுத்திக்கிட்டு இருக்கு. அப்ப, முழு (Full) - ரூ. 17. அரை (Half) - ரூ. 10. கால் (Quarter) - ரூ. 5.50ன்னு வித்தாங்களாம். இப்ப குவார்ட்டரே 200க்கு மேல விக்குது.

ஆமா, குவார்ட்டர் விலை எப்படி உங்களுக்கு தெரியுமா?! என்னோட அப்பா, அம்மா காசிக்கு போய் இருக்கும்போது இப்படி தண்ணியடிக்கலாமா?!

அடி லூசே! நான் தண்ணி அடிக்கல. சும்மா கேட்டதை வச்சுதான் சொல்றேன். ரிட்டையர்ட்மெண்ட் லைஃப்ன்னா என்னன்னு புரிஞ்சுக்கிட்டு உன் அப்பா நல்லா எஞ்சாய் பண்றாரு.  20 வயதில் வாழ்க்கையை ஆரம்பிக்கும் மனிதன் 40 வயதில் 'TIRED ஆகுறான். ஆனாலும், பிள்ளை, குட்டி, கடன், பொறுப்புன்னு சமாளிச்சுக்கிட்டு முன்னேறுகிறான். அதேமாதிரி, வேலையிலிருந்து ஓய்வு பெற்றபின் பாதி சம்பளம், இத்தனை நாள் பிசியா இருந்துட்டு, சும்மா வீட்டில் அடைஞ்சுக்கிடக்குறதுன்னு மீண்டும் டையர்ட் ஆவான். இப்படி ஒரு மறு களைப்பு அதாவது 'RE-TIRED' ன்னு ஒன்னு வரும். அதுக்கேத்த மாதிரி பிளான் பண்ணி தயாருகுங்கன்னு எச்சரிக்கதான் பணிஓய்வுக்கு 'ரிடையர்ட்' பேர் உண்டாச்சு, ஒழுங்கா பிளான் பண்ணதால, எந்த கவலையுமில்லாம, ஊர் ஊரா உன் அப்பாவும், அம்மாவும் சுத்தி வர்றாங்க.

அதும் சரிதான். இந்த மாதிரி பிளான் பண்ணாததால, எதுமே ஒட்டாதுன்னு விளம்பரப்படுத்தப்படும் நான் ஸ்டிக் பாத்திரத்தில் ஒட்டின ஸ்டிக்கரே பிஞ்சு வராம கம்பெனி மானத்தை வாங்குது...
எதும் வழக்கு தொடுக்காம இருந்தாங்களேன்னு சந்தோசப்பட்டுக்க வேண்டியதுதான். மதிய சாப்பாடு டைம் ஆச்சு. போய் சாப்பாடு எடுத்து வை. நான் கை கழுவிட்டு வரேன்..

ஐஞ்சுவை அவியல் தொடரும்...
நன்றியுடன்,
ராஜி